أصدقائى السلام عليكم
كنت فى اليومين الماضيين أقضى بعض الوقت مع جدتى ... وللأسف الشديد لايوجد لديها أى نوع من التسلية فلا إنترنت ولا حتى كمبيوتر لا شئ سوى كتاب يكون هو الصديق فى ساعات الفراغ .... المشكلة الكبرى أنه لايوجد من التليفزيون سوى القنوات الأرضية ... التى أجبرت وبالقوة على مشاهدتها ليل نهار وسماع تعليقات جدتى على ما يقال ... إبتداء من صباح الخير يا مصر فى السابعة وإنتهاءا بأحداث اليوم 24 ساعة فى الثانية عشرة
لم أكن أدرى أن التليفزيون المصرى مليئ بكل هذا الكم من الأكاذيب وحتى الذى يلقى الكذبة وهو غير مقتنع بها تراه يحاول تصنع الإقتناع
شاهدت مصطفى بكرى وهو يحاول الهروب من أسئلة المذيع فى كلام والسلام وذلك تجنبا للمشاكل
وإستمعت لأكاذيب فى صباح الخير يا مصر حول جدية الحكومة فى زيادة الأجور وأن الصحافة عندما تروج لهذا تكون السبب فى رفع الأسعار فى السوق .... يا سلام....
وجدية وزارة التعليم فى تحسين حال التعليم فى مصر ليضاهى أوروبا وأمريكا وحال الجامعات سيكون أفضل مما يجعلها تحتل مكانا بين 500 جامعة على مستوى العالم
وأكاذيب وزارة المالية .... ووزارة الصناعة بقيادة ترشيد الإستهلاك
والمزيد من الأكاذيب التى كلما سمعتها ضحكت وعلا صوتى فكنت أضحك كما لم أضحك من قبل
الحكومة فاكرة إن الشعب عبيط مثلا ولا إيه مش عارفة ... ولا فاكرين نفسهم هجيبوا الديب من ديله ... هما بيضحكوا على مين ... هو علشان رئيس الوزرا قال الشعب جاهل سياسيا يبقى مبنفهمش حتى فى لقمة العيش ... لما وزير التضامن اللى بوظ كل حاجة بدل ما يصلح (كإسمه) يعلل سبب إزدياد طوابير العيش فى الناس اللى مش مراعية إن الوزارة بتشتغل علشان مصلحتهم ففصلت الإنتاج عن التوزيع ومع كده الأزمة بتزيد يبقى الناس هى المشكلة ... وياريت نولع فيهم أحسن ونخلص بدل وجع الدماغ
مش عارفة ليه بسمسها أكاذيب ؟؟ ليه دايما أفترض إن الحكومة كذابة وكل ما يصدر عنها كذب فى كذب يعنى هو على وشك يبان يا نداغ اللبان ... مش شرط .. وكمان مش شرط نصدق شائعات الحكومة اللى بتقول إن مصر تعيش حالة تنمية إقتصادية لم تشهدها من قبل يروج لها وزير الإستثمار ربما لا يعرف أنه يضم إيراد المباع من الشركات والمصانع العامة إلى الدخل الذى يتحدث عنه فيكون الناتج بالأرقام كبيرا
ولننظر سويا للمثال .. إذا كان لدى أحدكم بعض المال ويعيش فى بحبوحة كل طلبات المدام مجابة يبقى هيبيع حتة الأرض اللى عنده ليه لأنه ميخليها للزمن ولا العمارة ..مهى فى الأول والآخر بتجيب إيراد حتى لو كان بيصرف على العمارة تصليحات أكتر من اللى بيكسبه منها أعتقد إنه فى النهاية برضه مش هيبيعها ولو هيضطر يهدها ويبنيها من جديد عمره ما هيبعها
ليست هناك تعليقات:
إرسال تعليق