أصدقائى السلام عليكم
طبعا أهنئ الجميع بحلول شهر رمضان الكريم أعاده الله عليكم بالخير واليمن والبركات
طبعا فى ناس كل أما تحس إن رمضان قرب تقلق لأنه مواكب لدخول المدارس ولأن العيد له متطلبات وهو يلى رمضان
يمكن زمان مكنش فيه قلق من رمضان جايز كانت الحياة حلوة وسهلة عن دلوقتى معرفش
بس اللى شايفاه إن الناس خايفة وقلقانه بس ليه دا حتى بيقولوا عليه شهر الخير يبقى ليه القلق
وبعدين هو ربنا شرع الزكاة ليه علشان يصرفها اللى مش محتاج لا طبعا الزكاة دى ليكوا يا كل من يقلق من دخول رمضان
بس فى حاجة عاوزة ألفت نظركوا ليها .....هو ليه كل واحد يطلع على التليفزيون يقعد يقول بطلوا أكل فى رمضان علشان الوزن الزيادة وبطلوا عزايم
أنا بقوله ملكش دعوة شوف نفسك إنت بس قاعد فى التكييف وبتقول كلام على كيفك
أولا الرسول نصحنا بإفطار الصائم يبقى لابد من العزايم اللى بتجمع الناس من السنة للسنه
ثانيا إن شهر رمضان واحد بس فى السنة كلها اللى الناس بتاكل فيه وتتبسط وكل أيام السن جايز يناموا من غير عشاء
ثالثا مفيش أى شخص بياكل بنهم غيركوا يا أصحاب التكييف تاكلوا وتتخنوا وبعدين تقولوا للناس تبطل أكل فى رمضان طيب إنصحوا نفسكوا الأولولا إنت يقولون ما لا يفعلون
أنا شايفة إن كل واحد يخليه فى حاله أحسن بدل ما تقولو دا شهر الصيام دا شهر الصيام طب مهى الناس أصلا فى صيام طول العام وطالما أن الحكمة من الصيام معروفة يبقى تسكتوا وبعدين إحنا بنطبق "كلوا من طيبات ما رزقناكم "يعنى بقى مش معقول نسمع كلامكم وكلام ربنا لأ
لما تبقوا إنتوا تبطلوا أكل فلوس الناس الغلابة نبقى إحنا نبطل أكل فى رمضان وأوعدكوا مش هنفطر إلا 3 تمراتبس لأننا طبعا هناكل لما نشبع فى غير رمضان ويمكن مش هنحمل هم رمضان أو غيره
بدل ما تفكروا فى الأكل فكروا إزاى الناس تواجه مشاكلها اليومية أصلا رمضان مش محتاج مصاريف زيادة ولا حاجة عند الناس الغلابة لأنهم أصلا معندهمش مصاريف
يبقى من الآخر خليكوا فى حالكوا "من إلتهى بعيب نفسه إشتغل عن عيب غيره "يا أصحاب التكييف
ليست هناك تعليقات:
إرسال تعليق