عم على

أصدقائى : السلام عليكم

أردت اليوم أن أعرفكم على عم على .... هو موظف ومش موظف عايش ومش عايش ....على حد قوله

فى يوم ما حب عم على يفضفض شوية ويعبر عن اللى فى قلبه وبما إنى إجتماعية جدا والكل متعود إنه يتبحبح معايا فى الكلام بحبح عم على وقالى :...ء

هى الحكومة بتعمل معايا كدا ليه هو أنا مش مكتوب لى أعيش مرتاح أبدا

قولتله :فيه إيه يا عم على مالك النهاردة قالب وشك

قالى : أصل الحكومة مش ناوية تجيبها البر وناوية تموتنى ناقص عمر

قولت : ليه هو إيه اللى حصل

قالى : إنت مسمعتيش الإشاعات اللى مالية البلد عن أنبوبة البوتوجاز اللى هتبقى ب 40 جنيه

قولت : لا دى هتبقى ب 25 جنيه بس

قالى : يبقى أكيد سمعتى عن الرغيف اللى هيبقى ب ربع جنيه

قولت : لا دا هيبقى بعشرة قرش بس

قالى : واضح إنك سمعك تقيل شوية

قولت : ليه بس

قالى : كل أما أقولك حاجة تقولى غيرها إنت معاهم ولا معانا

قولت : مع مين يا عم على منا معاك أهوه

قالى : شوفى أنا رضيت أكون موظف فى الحكومة ب 200 جنيه بس ولما الحكومة قالت مش هنصرف عليكوا لما تعييوا تبقوا تموتوا أهو أحسن علشان العمالة تخف قولت أحسن برضه أنا مش عاوز غير الستر ولما الحكومة باعت حقى فى المصانع والأراضى والبنوك مقولتش عايز حقى زى رمزى مقال فى الفيلم ولما الحكومة سايبة السايب فى السايب لكبرات البلد يكبشوا ويهجوا قلت وماله طول عمر مصر ولادة بكرة هتروق وتحلى مش علشان الكام مليار اللى راحوا بكرة تتعوض أهم خدوا الشر وراحوا مش يمكن كنا هنصرفهم فى وباء ولا فى حرب مثلا ... لكن كدة يا أستاذه الحومة زودتها معايا قوى كده أنا هعيش إزاى دا يا دوب لقمة العيش عليها حتة خضرة وشوية فول بيسندوا الواحد لآخر النهار ... بالشكل ده مش هلاقى آكل

قولت : ربك مبينساش حد يا عم على

قالى : منه لله اللى كان السبب أخونا مصطفى كامل

قولت : ليه بس الراجل مات

قالى : مهو السبب فى اللى إحنا فيه ربنا يستر علينا وعلى ولايانا ...ما إنت عارفة يا أستاذه أنا جوزت بنتى إزاى مكنش سى عزو يجى ويتجوزها والله دى قمر أحسن من ....ولا

أقولك الحيطان لها ودان

وفر عم على عندما مر بعض الضباط من أمامنا ووشوشنى وقال (يا قاعدين يكفيكوا شر ....) وذهب عم على

يا سلام عليك كلام جميل كلام معقول مقدرش أقول حاجة عنه

هو مين اللى غلط

أصدقائى :السلام عليكم

النهاردة أنا متلخبطة جدا ومش عارفة أحاسب الحكومة ولا أحاسب الشعب اللى شغال فى الحكومة والله هتستعجبوا من اللى بيحصل زيى بالضبط ... يعنى لو قلنا إن الحكومة هترفع الدعم عن أنبوبة البوتوجاز ورغيف العيش دى مشكلة ولما قطاع التأمين الصحى بتاع الغلابة يبقى بتاع الناس اللى معاها فلوس دى مشكلة أكبر يبقى هنا الحكومة غلطانة من ساسها لراسها لكن الغريب إن الشعب اللى بيشتغل فى الحكومة كمان غلطان ودا بقى مقدرش أقول عليه إنه حزب وطنى وهنا بقى أنا بستنجد بالحكومة والجهات المعنية واللى حصل كما يلى :...ء

أنا كنت ذكرت قبل كده إن أختى تكليفها كان فى الرعاية الصحية أو بيقولوا عليه تنظيم الأسرة أو رعاية الأمومة والطفولة ودى بشكل مختصر تعتنى بصحة الأم والطفل قبل الولادة وبعدها وأنشى المكان بناء على توصيات ماما سوزان وإنتوا عارفين طبعا إن ماما سوزان مبتدخلش فى حاجة إلا لما تكملها زى مكتبة الأسرة كده يعنى المركز ده كامل من مجاميعه ودا اللى أختى أصابها الذهول عند معرفته لأن قال إيه أحد الأطباء الزملاء كانت بتفتش فى فى دولاب الأجهزة بالصدفة فوجدت أجهزة على أعلى مستوى بل أحدث الأجهزة للعناية بالجنين والأم قبل الولادة ومتابعة حمل الأم.

الغريب والعجيب إن الطبيبة عندما أبدت إستعدادها لإستخدام هذه الأجهزة حتى تستفيد منها الأمهات المترددات على المركز إعترضت الممرضات المتواجدات والحجة إن العمل بهذه الأجهزة سوف يشيع وجودها بين الأمهات وسيتوافدون على المركز مما سوف يستدعى تواجدهن لفترة طويلة فى المركز ووجود طاقم عمل وفنيين وكل هؤلاء جميعا يذهبون إلى بيوتهم قبل إنتهاء موعد العمل بساعات بل لا يذهبون أصلا.

تخيلوا مدى الكسل من يقف لهؤلاء ويعرفهم أن مواعيد العمل لها قدسيتها وبعدين يعنى لما يروحوا وتيجى الست أم محمد تتعب مثلا وهى يا عينى يا دوب مصاريفها على قد إبنها محمد تعمل إيه وهى حامل تقطع من قوت إبنها اليومى علشان البهوات الممرضات والعمال مش عاوزين يشوفوا شغلهم يا سلام إمال فين الرقابة اللى الحكومة بتقول عليها وبعدين تيجى الحكومة تقول إحنا بنوفر للشعب تقوم أم محمد تقول لهم إنتوا كدابين دا المركز فاضى وبالتالى الحكومة والشعب يطقشوا فى بعض علشان شوية موظفين مش عاوزين يشوفوا شغلهم أنا بس عاوزة أقول لهم فى النهاية هو إنتوا مش بتشوفوا أفلام أجنبى فى البيت اللى بتروحوه بدرى مشفتوش الأجانب بيشتغلوا من نار إزاى وبعدين نرجع نقول إحنا إيه اللى مأخرنا عن الدول المتقدمة وأنا مبقيتش عارفة هو مين اللى غلط فى البلد دى إحنا ولا الحكومة ولا إحنا الإتنين ولا الجيران مهو أصل مفيش حد يرضى إنه يبقى غلطان يبقى مين الغلطان

بلد بتاعة شهادات صحيح

أصدقائى : السلام عليكم

تذكرت مقولة عادل إمام فى مدرسة المشاغبين عندما قال لى والدى أننى لابد أن أحمل شهادات فى الكمبيوتر و اللغة الإنجليزية وذلك كمسوغات للتعيين ..لأننى إعترضت وقلت طب ما أنا ببعرف كمبيوتر وإنجليزى كويس هى الشهادة هتفرق إيه ..طبعا بابا رد عليا وقالى وإيه اللى يثبت إنك بتعرفى مش لازم يكون معاكى شهادات

والله حال البلد عجيب الواحد مش عارف هى البلد بتاعة شهادات ولا بتاعة كوسة ولا بتاعة واسطة والحكاية كلها إتلخبطت فى بعضها والحالة معدتش زى الأول كانوا زمان يقعدوا يستنوا جواب القوة العاملة ومحدش بيسأل إنت بتعرف كمبيوتر ولا لأ يمكن مكنش فيه كمبيوتر أيام والدى و والدك لكن كان فيه إنجليزى ومحدش برضه كان بيسال

أنا مش مستغربة بس العجيب إنهم يفترضوا إن الشباب دلوقتى معندوش خلفية عن الكمبيوتر واللغات وإحنا فى عصر الإتصالات والإنفتاح على العالم .. أنا نفسى بسأل هل فى حد من أصدقائى الشباب معندوش خلفية عن الكمبيوتر واللغات طبعا أجاوب لأ على حد علمى إن فى دراسات إتعملت عن إستخدام الشباب للغات فى أثناء الكلام العادى وكانت النسبة مرتفعة جدا لإستخدام الشاب للغة اللى بيعرفها أثناء الحديث اليومى مع أصدقائه و أهله .... اما عن الكمبيوتر فحدث ولا حرج فإنتشار الإنترنت كافيه ساعد كثيرا على تعرف الشباب على العالم الجديد للميديا أو كما نقول التتدفق الشديد للمعلومات ونجد أن عدد الشباب الذين يمتلكون بريد إلكترونى يزيد كل يوم بمعدل 5%مما يعنى زيادة الوعى .. وتعالى لندخل الإنترنت لنجد أن حوالى 50 %من الشباب يحصلون على معلوماتهم من خلال الإنترنت بالإضافة طبعا إلى الفضائيات المنتشرة مؤخرا

إذن من أين لهم أن يفترضوا أن أن الشباب ليس لهم معرفة بالكمبيوتر واللغات ولا هى بلد بتاعة شهادات.......ز

مصر للمصريين

أصدقائى : السلام عليكم

أردت اليوم التطرق لموضوع التدوين فى مصر ...أنا طبعا لست ضد المدونين لأننى فرد منهم ولكن عندما يتعلق الأمر بالدين الإسلام بالطبع أكون أول المعارضين للمساس بدينى فكل شخص من حقة التحدث فى أى موضوع دنيوى أما الأمور الدينية فهذه محظورات .

أنا أؤمن كثيرا بالحرية ولكن ليست الحرية المطلقة إنما الحرية المسئولة ... وإن لم يكن الزميل المدون يمتلك أى مسئولية تجاه كتاباته فمن حق الدولة أن تحمى حق المجتمع وتمنع ما يمس به

أنا على سبيل المثال لا أستطيع المساس بحقوق الإخوة المسيحيين وذلك حفاظا على أمن وإستقرار المجتمع وتماسكه فى وجه المغرضين وخاصة المتربصين للمصريين

أستطيع القول أنهم غيرانين مننا فهم كما نقول مش على حامى ولا على بارد .... غير قادرين على رؤية مجتمع مختلف فى الأديان متحد فى القلوب فالقلب ملئ بحب الوطن طبعا وهذا ما فعلوه فى لبنان وسوف يحدث فى مصر إن لم نأخذ حذرنا من هؤلاء

نفسى أقول يا عالم ياهوه خدوا بالكوا من الحاقدين .و إعذرونى أننى لا أطيق سماع إسم الزميل المدون عبد الكريم سليمان لعدة أسباب أهمها أنه أساء للدين الإسلامى الذى كان فى يوم ما يدين به فمن حق أى شخص آخر بعد هذا أن يسئ إلينا طالما أن من منا ويدرى عنا يقول هذا فما بالنا بالغرباء ..

لذا أنا أويد حق الحكومة فى هذا الأمر فالإساءة للدين أو الوطن غير مطلوبة كل ما يهمنا هو الإرتفاع بشأن الوطن وليس الإنحدار به يا أصدقائى وزملائى وليس من حق أى منظمة غربية خاصة منظمة مراسلين بلاحدود أن تضم مصر للثلاثين دولة المضادين للحرية لأن هذا من حق شخص واحد فقط هو المواطن المصرى فمن حقه أن يقول إذا كانت مصر تصادر الحقوق أم لا وهذا الأمر لا يعنى أى طرف آخر سواء دولة أو منظمة( وطبعا الكل يعرف ما أقصد)...بعبارة أخرى خليكوا فى حالكوا وإحنا فى حالنا وبلاش نكرر موضوع التدخل فى الشئون العراقية لأن أصلا محدش هيسمح بالمهزلة اللى حصلت دى مرة تانية ... دا بعدكوا

عادت الروح إلى خالقها

أصدقائى : السلام عليكم

أردت اليوم أن أقدم أكاليل الحب والوفاء لصديقتى أمل التى توفت منذ ثلاثة أيام فى جريمة من أبشع الجرائم التى عرفتها ...هذه الوردة التى تزوجت منذ عامين فقط وتخلت عن إستكمال دراسة الماجستير من أجل الزواج وتفرغت لحياتها الزوجية بشكل كامل وهى كما أعرفها من النوع الهادئ المرح ...زكية النفس تجلس معها لا تمل من حديثها اللذيذ الممتع ..وبالرغم من شخصيتها الرائعة وتعليمها العالى وافقت على زوجها الأقل تعليما منها فتعليمه متوسط وذلك نظرا لضيق اليد ولكى يتفرغ والدها لتربية إخوتها الثلاثة الشباب وقد كانت قبل الزواج لا تترك لأمها شيئا تفعله وكان المنزل يضحك فى وجود أمل

أما بعد زواجها قطعت علاقتها بنا وكنا نحدثها صدفة عند والدتها عندما كانت تذهب إليها وأكرمها الله بفتاة غاية فى الجمال تشبها إلى حد كبير وقبل وفاتها كانت حاملا فى الشهر الثالث ولكن زوجها لم يمهلها أن ترى وليدها وقتلها بدون رحمة والأكثر من ذلك أنه قتلها بعد عودتها من عند والدتها ولم يخبر أهلها وإخوتها إلا فى اليوم التالى بحجة أنها مريضة حتى فوجئ الأهل بأنها متوفاة ولكن أملا منهم فى أن تكون على قيد الحياة أخذوها إلى المستشفى ليكشف لهم الطبيب أنها متوفاة منذ الليلة السابقة وأن لابد من حضور الطبيب الشرعى لمعرفة ملابسات الوفاة ليكشف النقاب عن جريمة الزوج البشعة فى خنق زوجته والتى عرفت بعدها أنه كان يضربها منذ أول يوم زواجها به بغرض دبح القطة وكان سبب هذه الليلة المشئومة أنها تأخرت فى زيارة والدتها عن الموعد المحدد لها

ما تعجب له أهلها عندما ذهبوا لإحضار متعلقاتها لوالدتها المكلومة أن المطبخ نظيف كيوم دخولها هذا المنزل المشئوم ولا توجد ملعقة غير نظيفة وقمصان البيه مرتبة بعد الكوى وجميع متعلقاته نظيفة ومرصوصة فى الدولاب الخاص والمنزل مرتب والأسرة نظيفة ولم تترك شئ ناقص سوى طفلة ليس لديها أم وفقط فقد إستكتر عليها والدها أن تكون مثل بيقية أقرانها من الأطفال

ليس أمامى سوى أن أقول يال قسوة القدر على هذه الفتاة ذات السنة وستة أشهر والدتها متوفاة وأبوها مجرم وفى حق من والدتها ..عسى الله أن يتقبلها بواسع رحمته ويدخلها فسيح جناته ويجمع بينها وبين والدتها إن شاء الله وأطلب منكم جميعا الدعاء لها بالمغفرة والرحمة بإذن الله .والبقاء والدوام لله

هم يبكى وهم يضحك

أصدقائى :السلام عليكم

النهاردة حبيت أعبر عن إستيائى الشديد من المؤتمر (القومى) للحزب الوطنى فى البداية لماذا لا تنقل مؤتمرات الأحزاب الأخرى فى التليفزيون اللى هو ملك للشعب والشعب طبعا كلنا عارفين إنهن فئات مختلفة مش حزب وطنى بس ولا أخفى عليكم سرا أننى كنت أفكر بالإنضمام للحزب الوطنى اهو يبقى ليا أى إنتماء والسلام لكن صدمت بالواقع المؤلم للحزب الوطنى

الحزب وقيادته أى حكومته فاكرين إنهم يقدروا يضحكوا على الشعب بصراحة أنا كنت هطق من الغيظ لما سمعت وزير المالية السيد بطرس غالى وهو فرحان بزيادة عائد ضريبة الدخل بالرغم بالرغم من تخفيضها وعلق إن دا دليل على زيادة أعداد الشباب الذى حصل على فرص عمل جديدة نتج عنها ضريبة عليه بصراحة كنت عاوزة أسأله إمال أنا لسه قاعدة فى بيتنا أعمل إيه كل ما أروح ماسبيرو أدور على شغل يقولولى تابعى الجرنال أما القنوات الخاصة والفضائية عاوزين خبرة والحمدلله لسه مخدتهاش الشهادة دى بس سبحان الله الرد على السيد الوزير وصل بسرعة متمثلا فى غرق شباب مصرى حاول العبور لإيطاليا للحصول على فرصة عمل ساعتها قولت فى بالى ياريتكو يا إخواتى فى البطاله كنتوا سمعتوا خطاب وزير المالية فى المؤتمر مكنش حصل اللى حصل

أما الأخ وزير الإستثمار فكان مبسوط جدا بزيادة التصدير ..واضح إنه نسى إنه أول من وضع عراقيل أمام التصدير وتسيهلات أمام الإستيراد علشان كده السوق كله غرق بالصينى والدليل كثرة عدد الموتوسيكلات الصينى وكمان التكتك اللى بقى بيمشى بدل المشاة كل ده بسببك وفى عهدك وإنت مبسوط بزيادة التصدير طيب جاوب على سؤالى هو الرز غلى برضه علشان التصدير يا راجل حرام عليك

واضح إن حكومتنا الموقرة كل حاجة عندها فى الزيادة حتى الأسعار فى الزيادة مفيش غير حاجة واحدة بس هى اللى بالناقص عمر الفرد لأنه كل ما يسمع المؤتمر ويخرج الشارع المصرى يلاقى الوضع كما هو عليه بل أسوأ تقوم تجيله نقطه فيموت فى الحال وبكده كل حاجة بتنقص مش بتزيد يا أساتذه المصانع مش بتزيد زى ما الأخ وزير الإستثمار بيقول دى بتنقص لأنها بتتباع والعمال بينقصوا لأنهم بيطلعوا معاش مبكر كل البلد بتنقص لحد ما هنختفى بإذن الله

حالة واحدة فقط

أصدقائى: السلام عليكم

الكل يتذكر طبعا ما قيل عن الملكة الفرنسية مارى أنطوانيت زوجة بونابرت أثناء الثورة الفرنسية عام 1798 حيث يقال أن الشعب كان يشتكى من قلة الخبز وعندما قيل لها الشعب مش لاقى رغيف العيش قالت وإيه يعنى ياكل جاتوه وإختلفت فى كرواسون أو مارون جلاسيه

القصة تدل على مدى فحش غنى الأغنياء وفقر الفقراء مما أدى إلى نشوب الثورة

نعود إلى وقتنا الحالى فقد حاول الشعب الفرنسى كثيرا مع رئيسه السابق جاك شيراك بأن تستمر فترة حكمه حتى وفاته ولكنه قال لقد سئمت كل هذا وأريد أن أترك كل مشاكل الحكم

لاحظتم معى الشعب يتمنى بقاء حاكمه ولا يتمنى زوال حكمه ولو كان له ولد لأصر الشعب على أن يرث حكم أبيه فلا مانع طالما أن فرنسا فى عهده شهدت إرتفاع فى مستوى الدخل وشهدت مصر على ذلك بالهجرة الغير شرعية من الشباب المتجه إلى فرنسا

المقصد من حديثى أننا لا نمانع من توريث الحكم الصالح فمع غلاء المعيشة يرتفع الدخل الفرنسى أما الدخل المصرى فكل يوم تدخل طبقة من طبقات المجتمع تحت خط الفقر حتى يصبح المجتمع كله تحت خط الفقر ومش هيبقى فيه حد أحسن من حد أقصد فى الشعب طبعا لكن أصحاب الحديد وأمثالهم سيظلوا طبعا فى الطليعة هؤلاء فوق خط الغنى وطبعا عمرهم ما هينزلوا تحت خط الغنى وإلا كده بقى يبقوا فقرا

رأيى الشخصى أننى مع التوريث فى حالة واحدة فقط مستحيلة التحقق ألا وهى حدوث إرتفاع فى مستوى دخل الفرد المصرى حتى مع إرتفاع الأسعار لن يصبح عائق أمام الفرد طالما أن دخله مرتفع وعندها فقط أضمن بحياتى أن الشعب سوف يذهب لصاحبنا ويقول له والنبى تحكمنا نبوس رجلك مفيش أحق منك بالحكم كلهم فاسدين وإنت إبن حبيبنا اللى رفعنا فى السما ورفع دخلنا يا شيخ خاصيمك النبى لتحكمنا

وعلى رأى الله يرحمه فؤاد المهندس "مش كده ولا إيه " هى هى