المكان : مجلس وزراء جمهوريه كفر ابو جاموس
الحدث : اجتماع السادة الوزراء لمناقشه المصيبه الجديدة
اصوات متداخله
يرتفع صوت السيد النظيف موجها كلامه الى المجلس و متسائلاً : نبداء بأيه يا غجر .. الخنزير ولا الجاموسه ؟
رد السيد وزير النقل فورا : الخنزير يا بيه
اعترض وزير الصحه قائلا : الجاموسه اهم
رد السيد النظيف لينهى المشكلة قبل ان تبدأ قائلا : خلاص ناخد اصوات البهايم
ارتفعت ايادى كل السادة الوزراء الحاضرين للتصويت !!!!!!
لم يرى السيد النظيف نتيجه التصويت لانه كان منشغلا بتغيير رنه موبيله التى ارسلتها له وزيرة البيئه وخفض صوت الجرس و وضع الموبيل على اذنه ليسمع الرنه الجديدة
( يانى يانى يانى مش هعمل كدة تانى )
غير السيد الرئيس رنه موبيله ثم التلف للمجلس قائلا :
خلاص طالما اتفقتوا .. اتكلم يا وزير التعليم !!!
وقف وزير التعليم مرتبكا وهو يقول : سيادة الريس احب اقولك ان العملية التعليمية مستمرة تطبيقاً للمبداء القائل بان العملية فى النمليه وانه لا يوجد سبب نهائياً البته يدعوا لأغلاق المدراس الا لو زاد عدد المصابين بالانفلونزا الوحشه عن 50 تلميذ فى الدقيقة الواحدة
وحضرتك احنا حطينا شرط للاغلاق هو ان يكون الطالب المصاب غير حاصل على اى كحكه.. و ان تكون الطالبه المصابة لا ترتدى النقاب وتكون حلوه شويه حسب توصيات الأمام الاكبر
انتبه الامام الاكبر ثم تنهد تنهيدة عميقة و رد قائلا : انفلونزا ايه ؟.. اييييه .. ميين ؟؟ محدش قااالى .. فيين ؟؟ مشفتش انفلونزا .. جولهم يسألو الخنزير .. معنفش حاجه .. الجاموسه هى اللى جت سلمت عليا .. انت بتكلمنى ليه .. مش قلت محدش يصحينى !!
استدرك السيد وزير التعليم خطأه الشنيع فى انه لم يدرك ان فضيلته نائم فى الاجتماع كعادته ..
فعقم وزير التعليم قائلا : وبعدين يا ريس اشمعنى انا يعنى؟ ما هى حوادث القطارت كتيرة و زى الفل اهى ومسمعناش حد يعنى بيقول نلغى السكة الحديد والناس تسافر فى سكة ابو زيد او تسافر من خلال القنوات الفضائية .. ما يحكمشى يا اخويا !!
عندها تدخل سيادة ( وزير النقل للدار الاخره) قائلا : بلاش التخبيط دة ما انا قلت يا باشا ان الجاموسة هى السبب فى الحادثة ... إحنا قطوراتنا زى الفل و قطع لسان اللى يلسن عليها بكلمة واحده وبعدين ما تشوفوا الفلاحين اللى سايبين المواشى سارحة .. فالحين بس يرووا الزرع من الصرف الصحى ..
إلتفت السيد وزير الزراعة اليه قائلاً بحده: لأأ بقى ... هو حتة عيل يعطس فى مدرسه تشطفونى انا !!؟ هو أحنا كنا لقينا المية و ماسقيناش .. ما اهو اصل الــ ..
بسسسسس هشششش
قالها كل الحاضرين لوزير الزراعه
معاد النشرة جه .. هات قناة الحظيرة
ارتفعت الموسيقى المميزة لنشرة الاخبار و مذيع قناة الحظيرة الشهيره يقول :
خبر عاجل
صرحت وكالة انباء زريبه الدوليه بأن الجاموسه تنتمى لتنظيم كندوز الارهابى ... والمنشق عن تنظيم القاعدة الجديد ( القاعدة وحياتك ما انا قاعدة ) وانه تم رصد اتصال هاتفى بين الجاموسه منفذة الحادث والسيد حسن نصر الله قبل تنفيذ العملية بثلاثه ساعات
بعدها قامت منظمه كندوز باعلان مسئوليتها عن تنفيذ العملية التى قامت بها جاموسه مخلصه من ابناء المنظمه التى قالت فى تسجيل صوتى لها قبل لحظات من تنفيذ العملية انها قامت بالعمليه احتجاجاً على ارتفاع سعر البرسيم الجنونى و تغيير رائحته و طعمة بعد ريه بمياة المجارى
واعلنت مصادر مسئولة فى المنظمة عن نيتة المنظمة فى تكرار العملية فى حالة عدم الافراج عن قائد الجناح البرسيمى السيد عجل ابو جاموس المحتجز فى زريبة العمدة
وقد قامتقوات امن الزريبه بالقاء القبض على عدد من الجواميس المشتبه فيهم .. وذالك عند مداهمه ..
خلاااااص اقفل اقفل
الف مبروك ..
ارتفعت اصوات جميع الوزراء تهنئ السيد وزير النقل
مبروك .. خلاص يا عم .. اهى لبست فيهم .. ابسط يا سيدى .. يلا نحتفل .. يا الف نهار ابيض .. محدش شاف نضارتى .. انا رايح النادى اجيب فيفى من هناك ..ياااه هم وانزاح ... .. مين اللى بيعطس دة .. يا دى النيله .. لأ انا مروح .. النضاره كانت هنا .. يرحمكم الله .. فتكوا بعافيه